Trajneri Ilir Daja foli pas ndeshjes me Skënderbeun, duke komentuar nga gjykimi deri te momenti i golit. Për “Supersport” në emisionin “Gol pas Goli” tekniku i kuqezinjve theksoi se para se ta kërkojnë gabimin te të tjerët duhet të shohin te vetja.
“Ishte një lojë e ndarë në dy pjesë. Në pjesën e parë bëmë mirë, ndërsa në pjesën e dytë sa për meritë të kundërshtarit dhe për gabimet tona kundërshtari ishte më mirë. Atë që bëmë në pjesën e parë nuk e bëmë në pjesën e dytë, duke dhuruar dhe shumë topa për Skënderbeun, i cili po ashtu kishte meritë, pasi e rriti lojën në pjesën e dytë”.
“Nuk përbën më lajm pjesa e mungesave, pasi nga fillimi dhe deri tani, kur janë luajtur 13 javë nuk kemi pasur ekip të plotë. Beqja është i ri dhe ka një gjendje fizike të mirë. Ishte një zgjidhje duke parë dhe lojtarin që Skënderbeu ka në të majtë. Ishte një lëvizje pozitive, por në pjesën e dytë kishte harxhuar shumë energji dhe e zëvendësuam, edhe për shkak të kontingjentit që kemi në dispozicion”.
“Nuk jam ankuar as te Skënderbeu dhe as te Flamurtari për gjyqtarët edhe pse javës që shkoi e patë vetë se çfarë ndodhi në minutën e 9-të. Ajo që dua unë është loja efektive. Nuk e ndihmojmë futbollin duke i rënë bilbilit 90 apo 100 herë në një takim. Ka dhe dyluftime kur mund të lejohet vijimi i lojës brenda rregullores së lojës. Sulmuesi ynë, Bushiç, në çdo lloj kontakti nuk ka faull, jo për ndeshjen e sotme, ndërsa për kundërshtarin e shtynë. U thash dhe lojtarëve në dhomat e zhveshjes, para se ta kërkojmë te të tjerët duhet ta kërkojmë te vetja jonë”.
“Kishte raste kur i kemi dhuruar topin kundërshtarit edhe kur nuk ishim në presion, që do të thotë harxhim energjie, por dhe ana psikologjike i jep shtysë kundërshtarit dhe e çon skuadrën në një presion të pavend. Nëse gabon që kur merr topin do të vijë një moment kur gabon afër zonës, nga ku erdhi dhe goli”.