Kapiteni i Teutës, Tefik Osmani, beson se skuadra e tij do fillojë kthesën duke filluar nga takimi i së mërkurës ndaj Flamurtarit në Vlorë. Në intervistën për “RTSH SPORT”, futbollisti i durrsakëve u shpreh i bindur se skuadra ka një grup të fortë që do të bëjë mirë në tetë javët e mbetura.
“Kur nuk arrihen rezultate është shumë e lehtë të gjesh “fajtorin”. Si kapiten më duhet t’i jap mbështetje të gjithë ekipit. Kanë mbetur tetë javë dhe duhet të japim të gjithë maksimumin. Ishte ky ekip që ka bërë lojëra të mira”.
“Në këtë kampionat nuk ka asnjë ndeshje të lehtë. Mendoj se është ndeshje shumë e vështirë, por besoj se pas asaj humbje në Laç i kemi vënë kapakun dhe shkojmë në Vlorë për një rezultat pozitiv”.
“Kur shikon rezultatet që nuk janë të mira fillon dhe presionin për objektivin e Europës. Megjithatë, kemi një grup shumë të fortë që do t’ia dalë të hedhim pas këtë moment”, përfundoi Osmani.