Lojtarët e Lacios kanë dalë nga fusha me një pikë për të tretën herë radhazi në Serie A. Sonte ndaj Kievos, në ndryshim nga ndeshja me Milanit, nuk pati festë, pasi djemtë e Simone Inzagit mund të ishin rikthyer te fitorja nëse do të tregoheshin pak më të qetë para portës kundërshtare.
Kapiteni Serxho Pelisier i dha avantazhin Kievos në minutën e 25-të. Predha e 39-vjeçarit nuk i la asnjë shans Strakoshës. U desh të fillonte pjesa e dytë që Lacio të “ndezte motorët”, por portieri Sorrentino dhe shtylla ndaluan goditjet e njëpasnjëshme të djemve të Simone Inzagit.
Në minutën e 66-të Imobile barazon shifrat me një goditje nga brenda zonës së rreptësisë. Lacio vazhdon presionin në pjesën e mbetur të lojës, por vendasit nuk kanë ndërmend ta lëshojnë pikën e çmuar.