Sfidë shqiptarësh në Rumani, Aliji triumfon përballë Qakës

Ndeshja mes Dinamo Bukureshtit dhe Poli Iashit pa dy futbollistë shqiptarë të vihen kundër njëri-tjetrit, Naser Alijin dhe Kamer Qakën. Të dy futbollistët kuqezi luajtën 90 minuta në këtë sfidë, që u fitua nga ekipi i Alijit.

Dinamo e Bukureshtit triumfoi pastër 3-0 dhe Aliji bëri një ndeshje të mirë si mbrojtës i majtë. Numri 7 ishte aktiv dhe ndihmoi shumë skuadrën në fazën e sulmit, si dhe ishte solid në prapavijë, duke kontribuar në rrjetën e paprekur për skuadrën e tij.

Edhe Qaka bëri një ndeshje relativisht të mirë, por nuk arriti të ndihmojë skuadrën që të shmangë humbjen e thellë. Madje, mesfushori u ndëshkua dhe me karton të verdhë në minutën e 82’. Me këtë fitore, Dinamo Bukureshti ngushton distancën me Poli Iashin në vetëm tri pikë, por asnjëra nga skuadrat nuk po bën një edicion të mirë deri më tani.