Teuta do të luajë në fundjavë përballë Skënderbeut, një sfidë shumë delikate për skuadrën durrsake. Të besuarit e Bledi Shkëmbit do të synojnë të marrin fitoren përballë juglindorëve, pasi tri pikët janë të domosdoshme për të arritur te objektivi i tyre, vendi i tretë në kampionat dhe Kupat e Europës.
Javën e shkuar, Teuta nuk arriti të marrë më shumë se një pikë përballë Luftëtarit, sfidë e mbyllur 0-0 në “Niko Dovana”. Këtë javë, transferta përballë Skënderbeut pritet të jetë edhe më e vështirë, jo vetëm për kundërshtarin, por dhe për disa problemeve që skuadra durrsake ka në organikë.
Armando Vajushi nuk po arrin të ruajë vazhdimësinë dhe dëmtimet e tij po shqetësojnë jo pak trajnerin Shkëmbi. Ish-mesfushori i kombëtares kuqezi është në dyshim për sfidën kundër Skënderbeut. Mungesë e sigurt është ajo e mesfushorit Avdyli, i pezulluar për shkak kartonësh. Por te Teuta, ka dhe një lajm të mirë, pasi mbrojtësi Ditmar Bicaj është rikthyer nga pezullimi me karton të kuq (përballë Kukësit) dhe do të jetë nën urdhrat e teknikut Shkëmbi.