Milani dhe Interi vazhdojnë punën për të patur një stadium modern dhe bashkëkohor. Palët janë në dyshim midis prishjes së “San Siros” e ndërtimit të një stadiumi nga e para dhe rikonstruktimit të tij.
Sipas raportimeve të mediave italiane, opsioni i parë po merr gjithmonë e më shumë mundësi. Diçka e tillë është kërkuar nga Milani, ndërsa po binden për ndërtimin e një stadiumi të ri edhe zikaltrit.
Dy klubet duhet të paraqesin një projekt të përbashkët deri në fundin e muajit prill dhe fjalën e fundit do ta thotë komuna e Milanos. Stadiumi i ri mendohet të ndërtohet në zonën aktuale të zënë nga parkingjet, ndërsa mitiku “San Siro”, stadiumi më i madh në Itali, me një histori 94-vjeçare, mund të përfundojë pjesë e historisë, librave dhe memorjes së tifozëve të shumtë.