Runi del në mbrojtje të Murinjos: Po e bëjnë “kokë turku”

0

Uejn Runi dhe aventura e tij amerikane sa vjen dhe po bëhet më e bukur. Anglezi duket se ka gjetur vetveten, teksa në tre ndeshjet e fundit ka shënuar plot pesë herë. DC Junajtid e sheh veten vetëm një hap larg zonës “play-off”, ku diferenca me rivalin më të afërt është shkurtuar në vetëm një pikë, por ekipi i Runit ka dhe dy ndeshje për të rikuperuar.

Ish-kapiteni i kombëtares angleze shpenzoi plot 13 sezone si një lojtar i Mançester Junajtid dhe rezultatet e fundit të ekipit nga “Old Traford” e kanë shqetësuar jo pak. Runi është rikthyer të flas për ish-ekipin e tij, ku për shumë kohë ishte një idhull për tifozët. Anglezi ka dalë në mbrojtje të trajnerit Murinjo, teksa nuk e sheh si fajtorin e vetëm për ecurinë e Junajtid.

“Trajneri ka një rol shumë të rëndësishëm dhe mund të ndryshojë shumë gjëra, por në fushë janë lojtarët ata që duhet të japin më të mirën. Mendoj se është faji i të gjithëve, pak nga të gjithë janë fajtorë, por Murinjo vihet menjëherë në shënjestër si gjithmonë. Është një nisje e vështirë, por ata duhet të ringrihen dhe të përmirësohen. E njëjta gjë ka ndodhur në kohën kur unë isha pjesë e Junajtid dhe trajner ishte Van Gal. Personalisht mendoj se trajneri në atë kohë na përgatiste për ndeshjet në mënyrë brilante, por ne në fushë nuk prodhonim lojë të mirë”.

You might also like
Leave A Reply

Your email address will not be published.