Roma nuk po kalon një moment të mirë këtë sezon dhe në kampionat është disi larg pritshmërive. Humbja ndaj Udinezes javën e shkuar, si dhe humbja ndaj Realit në mesjavë, ka sjellë përsëri pikëpyetje në lidhje me stolin e verdhekuqve.
Mbrëmjen e së dielës, Roma do të ketë një sfidë mjaft delikate ndaj Interit, ndeshje që do të përcaktojë shumë edhe për ecurinë e Di Françeskos, i cili u vërshëllye pas sfidës ndaj Realit.
Ditët e fundit po përflitet se zëvendësuesi i Di Françeskos mund të jetë një njohje e vjetër për Romën. Pikërisht ish-lojtari dhe trajneri i saj, Viçenzo Montela, shihet si zëvendësuesi kryesor i Di Françeskos në rast se ky i fundit do të shkarkohet.
Montela ka qenë në krye të Romës në vitin 2011, ku e drejtoi ekipin verdhekuq për 16 ndeshje. Një emër tjetër që ishte përfolur, ishte dhe ai i Paolo Sosës, por ky i fundit duket se është shumë pranë Sauthemptonit në Angli.