Juventusi është një nga ekipet me mbrojtjen më të fortë në botë. Kështu ka qenë gjithmonë dhe vështirë se do të ndryshojë në të ardhmen. Kampionët e Italisë janë gjithmonë të kujdesshëm për pjesën difensive.
Andrea Barzalji do të luajë në formacion në ndeshjen e sotme kundër Spalit. Takim pa ndonjë rëndësi të madhe, pasi titulli është në xhep dhe mendja te ndeshja e kthimit kundër Ajaksit. E ardhmja e 37-vjeçarit pritet të jetë stoli. Maks Alegri u ndal te situata e mbrojtësit në konferencën për shtyp përpara transfertës së sotme.
“Barzalji erdhi me ne në Amsterdam, edhe pse nuk mund të luante. Ai ka filluar t’i shohë gjërat nga një perspektivë tjetër krahasuar me atë të futbollistit. Andrea është shumë inteligjent. Mendoj se kur nis një punë të re, gjëja më e rëndësishme është që të vëzhgosh dhe dëgjosh. Ai mund të bëhet pjesë e stafit teknik për të mësuar dhe ndihmuar mbrojtësit se si të përmirësohen. Në këtë aspekt është profesor. Mendoj se do të ishte një vlerë e shtuar e Juventusit”, përfundon trajneri livornez.