Kukësi arriti që të mundte minimalisht Skënderbeun në një ndeshje shumë delikate të premten që shkoi, por një sfidë akoma dhe më e rëndësishme do të luhet këtë javë. Verilindorët do të matin forcat me kryesuesit e Partizanit dhe Cungu ka nisur që të shqetësohet që tani.
Mungesë e sigurt është ajo e Iralkli Dzaria, i cili në ndeshjen me Skënderbeun mori kartonin e katërt të verdhë. Gjeorgjiani bëri një ndeshje mjaft të mirë ndaj korçarëve, por është i detyruar që ta ndjekë nga tribuna ndeshjen e radhës.
Vëmendja është nga infermieria, ku shpresohet që të jetë i gatshëm Donjet Shkodra. Ky i fundit ishte në stol në takimin e fundit dhe me shumë gjasa do të jetë i gatshëm për ta nisur nga minuta e parë ndeshjen e së premtes.
Vëmendja është edhe nga Shafik Tigruxha, i cili prej pak javësh nuk është i disponueshëm. Po ashtu edhe kapiteni Ylli Shameti ka postuar ditën e djeshme një foto, ku shihet se po bën terapi, por nuk pritet që gjirokastriti të mungojë.
