Federiko Kieza është një nga shpresat e mëdha të futbollit italian. Anësori ofensiv i Fiorentinës kërkohet nga disa klube, me në krye Juventusin. Megjithatë, 21-vjeçari pritet të qëndrojë edhe sezonin e ardhshëm në Firence.
Roko Komiso sapo ka marrë drejtimin e presidencës së Fiorentinës dhe ai e di mirë se shitja e “yllit” do e armiqësonte me tifozët e rinj. “Kieza do të qëndrojë me ne, të paktën edhe një vit. Më kanë siguruar se presidenca e kaluar nuk kishte asnjë lloj akordi për shitjen e tij, kështu që nuk besoj se mund të ketë diçka që se di. I pres në Amerikë, Kiezën, Pezelën dhe Milinkoviç”, thekson padroni vjollcë.
Nga ana tjetër, Fiorentina është hedhur në kërkim të një sulmuesi. Emri i preferuar është Çiçarito Hernandez. 31-vjeçari meksikan ka edhe një vit kontratë me Uest Hemin. Ai tundohet nga ideja për të provuar një eksperiencë në Serie A, ndërsa Fiorentina po përgatit ofertën zyrtare.