Përballja midis Milanit dhe Atalantës ka përfunduar në një barazim 2-2. Rezultat ky që kënaq së tepërmi ekipin mik, ndërsa skuadra e drejtuar nga Gatuzo merr barazimin e dytë radhazi në një ndeshje ku fitorja ishte detyrim ndaj tifozëve të shumtë, por edhe për objektivat e klubit, ku këtë vit synohet një vend që të çon në Champions me doemos
Ndeshja nisi në mënyrën më perfekte për ekipin e Gatuzos, teksa u deshën vetëm 80 sekonda për të dërguar në delir tifozët kuqezinj. Gonzalo Higuain shënon golin e tretë në tre ndeshjet e fundit dhe të parin në “San Siro”.
Një pjesë e parë që më pas vijoi e ekuilibruar dhe çoi në pushim skuadrat me shifrat 1-0. Pjesa e dytë nis me dy zëvendësime tek miqtë, të cilët sollën ndryshim. Ishte pikërisht një asist i të sapo futurit Duvan Zapata, i cili çoi te goli kapitenin e bergamaskëve Gomez. Pas golit iu deshën vetëm 7 minuta kuqezinjve të Gatuzos për të reaguar. Një dalje e Susos nga krahët, i cili asiston për Bonaventurën që shënon golin e “ish”-it. Në pjesën e mbetur të lojës skuadra e Gasperinit u mundua të barazonte shifrat, por Milani po administronte me kujdes lojën duke bllokuar sulmet e Atalantës, derisa një pakujdesi në zonën e rreptësisë u shfytëzua në maksimum nga argjentinasi Rigoni që barazoi shifrat në kohën shtesë.