Takimi i javës së 22-të mes Kamzës dhe Kastriotit ëhstë mbyllur me fitoren në limite të miqve, falë një goli të Ymerajt, që ndëshkoi ish-skuadrën e tij. Në pjesën e parë, takimi foli për Kastriotin, me djemtë e Devollit që ishin më kërkues. Megjithatë, skuadra e Kamzës u mbrojt mirë dhe rrezikoi në disa momente me kundërsulme. Pjesa e parë u mbyll pa shumë raste dhe me të dyja skuadrat që i dhanë prioritet mbrojtjes.
Pjesa e dytë nisi pa asnjë ndryshim në formacion dhe si pasojë, edhe mbarëvajtja e ndeshjes ishte pothuajse e njëjtë. Gjoka iu kërkoi të tijve të shtyjnë më përpara në kërkim të fitores dhe Kamza filloi të marrë drenat e lojës në kontroll.
Megjithatë, sulmi i bluve la për të dëshiruar dhe rastet ishin me pikatore. Shansi më i pastër u paraqit në këmbët e kapitenit Sebino Plaku, por sulmuesi nuk arriti të shtyjë topin drejt rrjetës kundërshtare. Minutat kaluan të qeta, por në sekondat e fundit të sfidës, Kastrioti gjen golin.
Është një “ish” që ndëshkon Kamzën. Në minutën e tretë shtesë, Ymeraj realizon një gol shumë të bukur, duke “vjedhur” tri pikët dhe duke i dhënë një triumf shumë të rëndësishëm skuadrës së tij.
KATEGORIA SUPERIORE, JAVA 22
E diel, 17 shkurt ora 14:00
Stadiumi “Kamza”, Kamzë
KAMZA – KASTRIOTI 0-1
Shënues: Ymeraj 90+3′
Kamza: Avdyli, Shala, Qaqi, Beqiri, Bonani, Rezi (Mumajesi 82′), Arrabal (Mehmeti 70′), Malaj (Orelesi 75′), Fukui, Plaku, Martinena. (Në dispozicion: Selaci, Bitri, Orelesi, Zisi, Mehmeti, Mumajesi, Peçi) Trajner: Ernest Gjoka
Kastrioti: Çekrezi, Husein, Shehi (Selmani 77′), Çela, Ndreca, Shehu, Ymeraj, Kalaja, Roxher, Bardhi (Neziri 90′), Vatnikaj (Okebugu 65′). (Në dispozicion: Puja, Selmani, Bojom, Okebugu, Neziri, Fejzaj. T. Marku). Trajner: Bledar Devolli
Gjyqtarë: Andi Koçi, Fatmir Lamaj, Mateo Sadikaj, Emirion Sino
Kartonë të verdhë: Arabal 29′, Beqiri 70’ / Husein 52′
Delegat: Besnik Çela; Vëzhgues: Arjan Mali
EPISODET
90+’ Mbyllet takimi, Kamza mposhtet në limite
90+3’ Goooooool Kastrioti! Ymeraj ndëshkon Avdylin me një supergol, duke i dhënë pikët e plota krutanëve. Luhen sekondat e fundit.
80’ As zëvendësimet nuk ndryshojnë gjë, vazhdon ndeshje e qetë
60′ Kamza kërkon të gjejë avantazhin, por mbrohet mirë Kastrioti
46′ Starton pjesa e dytë, asnjë ndryshim nga dy trajnerët
45′ Mbyllet pjesa e parë pa gola
35′ Sfidë e qetë në Kamzë, të dyja skuadrat nuk duan të pësojnë
24′ Zgjohet disi Kamza, por ende asnjë rast për tu shënuar
2’ Kastrioti e nis vrullshëm, Kamza rrezikon autogolin. Avdyli shpëton portën
1′ Starton sfida, topin e parë e luan Kamza