Bajerni i Mynihut mposhti Shalke 04 në transfertë me rezultatin 0-2 dhe arriti fitoren e katërt rresht në kampionat, duke kryesuar i vetëm Bundesligën, me dy pikë më shumë se Herta e Berlinit. Hames Rodrigez ishte njeriu i ndeshjes për bavarezët. Kolumbiani shënoi golin e avantazhit, fitoi penalltinë e shndërruar në gol nga Levandovski dhe humbi një rast të pabesueshëm me portë bosh.
27-vjeçari është rikthyer në formën e tij më të mirë dhe po jep një kontribut të madh në ekipin e drejtuar nga Niko Kovaç. Pasi shënoi një gol të bukur me kokë, pas krosimit të Kimish, mesfushori ofensiv dështoi të shënonte golin e dytë personal përballë Shalkes.
Bavarezët ndërmorën një sulm të rrezikshëm dhe Rodrigez kishte shansin për të shënuar me portën bosh, por çuditërisht ai e nxori topin jashtë. Megjithatë, lojtari nuk u demoralizua dhe më vonë arriti të fitonte një penallti dhe Levandovski shënoi duke vulosur fitoren e radhës për gjigandët bavarez.