VIDEO | Çmenduri e Belotit, Torino fluturon drejt Europës

0

Spektakël në ndeshjen e parë të Serie A për ditën e sotme. Torino ka triumfuar me përmbysje ndaj Sasuolos me shifrat 3-2 në një ndeshje të çmendur.

Sfida nisi më mirë për Torinon, që në minutën e 17-të pati një mundësi të shkëlqyer për të kaluar në avantazh, por Andrea Beloti u tregua i pasaktë nga pika e bardhë e penalltisë.

Dhjetë minuta më vonë, ishin miqtë nga Sasuolo, të cilët kaluan në avantazh me anë të Burabias. Ky i fundit shënoi me një goditje të bukur nga jashtë zone, duke mposhtur portierin Sirigu.

Gjithsesi, autori i golit, Mehdi Burabia bëri një gafë të madhe, teksa në festën e golit hoqi fanellën, duke u ndëshkuar me kartonin e dytë të verdhë dhe duke lënë ekipin e tij në inferioritet numerik.

Torino arriti të përfitonte vetëm në pjesën e dytë, më saktë në minutën e 56-të, kur De Silvestri asistoi për Belotin, i cili këtë herë nuk gaboi duke vënë baraspeshën.

Vendasit e shtuan presionin, por ata që shënuan ishin miqtë. Sasuolo befasoi torinezët në minutën e 71-të, ku ishte Pol Lirola, i cili realizoi një gol të mrekullueshëm me finte.

Spektakli nuk u mbyll me aq, pasi dhjetë minuta më vonë, “Demat” reaguan përsëri me anë të Simone Zazas. Sulmuesi u lirua bukur në zonë dhe i vetëm përballë Konsilit e ndali topin në rrjetë.

Dy minuta më vonë ishte Andrea Beloti, i cili dhuroi spektakël, duke shënuar me roveshatë një gol të pabesueshëm. Tri pikë për Torinon, që tashmë kalon Romën në renditje, si për të konfirmuar një sezon fantastik.

You might also like
Leave A Reply

Your email address will not be published.