Teuta do të ndeshet nesër në Vlorë kundër Flamurtarit. Si durrsakët ashtu dhe kuqezinjtë kanë të njëjtën kuotë pikësh, 14 dhe diferencat mes tyre janë të vogla. Në ndeshjen e fazës së parë këto dy skuadra u ndanë në një barazim pa gola, çka është një tregues tjetër se edhe në ndeshjen e nesërme diferencat do të jenë të vogla.
Trajneri Blendi Shkëmbi ka folur për “Supersport” para takimit me vlonjate, ku ka treguar se e di shkallën e vështirësisë në këtë ndeshje, por beson se me pak fat mund të ja dalë që të marrë një rezultat pozitiv. Tekniku korçar beson se skuadra është në rrugine duhur për të gjetur atë vazhdimësinë që ai e kërkon me çdo kusht.
“Futbolli nuk ka nevojë për nota, por deri diku kemi bërë mirë, në disa momente në disa ndeshje kemi bërë keq. Duhet të gjejmë atë vazhdimësinë, të gjejmë një të mesme ku të luajmë mirë, të bëjmë futboll të mirë dhe të kemi rezultate ndeshje pas ndeshje”.
“Është një ndeshje shumë e vështirë. Kundër Flamurtarit kemi bërë një ndeshje të mirë si ne dhe Flamurtari në takimin e parë që kemi zhvilluar. Sipas meje ka qenë një përballje e bukur, edhe pse të dyja skuadrat bënë gabime. Ne do të shkojmë për të vijuar me rezultate pozitive. Urojmë që të kemi dhe pak fat në këtë sfidë”.