Simo Rrumbullaku është një nga lojtarët më të rëndësishëm për trajnerin Cungu, i cili i ka besuar dhe shiritin e kapitenin në mungesë të Shametit. Mbrojtësi i majtë ka kualitet dhe cilësi, ndaj mungesa e tij është ndier në shumë raste.
Ky sezon ka qenë i pafat për Rrumbullakun, i cili është dëmtuar dy herë radhazi. Por asgjë nuk mbaroi këtu, pasi numri 20 i verilindorëve është dëmtuar sërish. Në takimin kundër Luftëtarit, mbrojtësi doli i dëmtuar nga fusha e lojës.
Ditën e diel, 27-vjeçari ka udhëtuar drejt Janinës, aty ku ka kryer rezonancën dhe ka mësuar shkallën e dëmtimit. Siç konfirmon vetë mbrojtësi për “Sport Ekspres”, do të qëndrojë pushim për dy javë, por në rast se stërvitja individuale shkon mirë, mund të rikthehet më shpejt në fushat e lojës. Gjithashtu, mbrojtësi u shpreh optimist dhe për titullin kampion, ku tha se dëshiron të rikthehet sa më shpejt në fushë për të ndihmuar Kukësin që të arrijë dhe të parakalojë Partizanin në renditje.
