Napoli dështoi në ndeshjen e parë çerekfinale të Ligës së Europës. Arsenali rezultoi shumë i vështirë për ekipin italian. 2-0 fituan vendasit në Londër, ndërsa sfida e kthimit do të zhvillohet javën tjetër në “San Paolo”.
Pjesa e parë e Napolit ishte shumë e dobët. Pavarësisht kësaj, Karlo Ançeloti ka zgjedhur qetësinë në dhomat e zhveshjes. Siç raportojnë mediat italiane, trajneri është shfaqur i përmbajtur në pushim, diçka në stilin dhe karakterin e tij.
Asnjë qortim, aspak nevojë për ngritje zëri, vetëm qetësi dhe besim për të bërë më mirë. Efektet u dhanë në 45-minutëshin e dytë. Napoli u “ringjall”, kërkoi golin, por Zielinski humbi një shans të artë për të rihapur sfidën.
Megjithatë, lojtarët kanë besim se do të kthejnë rezultatin në fushën e tyre. Trajneri ju ka rritur besimin dhe Napoli do të bëjë maksimumin për t’u kualifikuar në gjysmëfinalet e Ligës së Europës.