Arsenal është duke kompletuar lëvizjen më të bujshme të verës në Premier Ligë. Londinezët janë shumë pranë arritjes së marrëveshjes me Lilen për blerjen e Nikolas Pepe. Në arkat e francezëve do të shkojnë afërsisht 90 milionë euro, çka përbën blerjen më të madhe të kësaj vere në Angli.
Në lidhje me këtë temë ka folur shoku i Pepe te nënkampionët e Francës. Portugezi është i sigurt se ai do bëjë mirë në “Emirates Stadium” dhe thur elozhe për cilësitë e 24-vjeçarit.
“Ai është i pabesueshëm. Nëse do vazhdojë me të njëjtin nivel, atëherë tifozët e Arsenalit do të jenë shumë të lumtur. Është super i shpejtë, ka një këmbë të majtë super dhe nuk ka të dytë si ai në duele një më një. Finalizon mirë, fiton faulle. Tifozët e Arsenalit do të ndihen shumë komodë me të në skuadër. Arsenal do të jetë një ekip shumë i fortë në luftën për Premier Ligën”, u shpreh Fonte.