Gjatë ditës së djeshme, Zllatan Ibrahimoviç gëzoi tifozët e Milanit, duke deklaruar se do i pëlqente një rikthim në Milanelo. Bomberi u aktivizua për dy sezone me kuqezinjtë, duke fituar dhe titullin e fundit kampion të ekipit. Më pas largimi drejt PSG, osë më saktë vendimi i drejtuesve për ta shitur.
“Milani më pëlqen dhe kjo gjë nuk është sekret. Kam kaluar dy vite fantastike me kuqezinjtë dhe nuk dëshiroja të largohesha por, siç e kam thënë në librin tim, më detyruan të largohem. Fituam titullin, u shpalla golashënues, klub shumë i mirë dhe atmosferë fantastike”, u shpreh Ibra, ndërsa ai dhe Milani janë shumë afër njëri-tjetrit.
Palët po punojnë për të arritur akordin me sulmuesin e Los Anxhelos Galaksi, ndërsa preferohet formula e huazimit. Pak a shumë si rasti i Devid Bekam, i cili kaloi te Milani për 6 muaj në vitin 2009, për t’u kthyer përsëri në Amerikë.
Ibrën e pret një rrogë prej 2 milionë eurosh për 6 muaj, ndërsa ai mund të rinovojë dhe për një vit me ekipin e “djallit”. Diçka tjetër që shtyn suedezin drejt rikthimit në Milano është dha gruaja e tij. Helena ka mbetur shumë e lidhur me qytetin e modës dhe ajo është pro-rikthimit të Ibrës në Itali.