Krenaria e Murinjos: Vetëm unë kam mposhtur Juventusin!

Zhoze Murinjo po shijon pushimet, po studion dhe po qetësohet. Një trajner nuk mund të qëndrojë gjatë larg stolit dhe portugezi është gati për t’u rikthyer në sezonin e ri.

Ai po bën edhe rolin e opinionistit, ndërsa analizat e tij janë gjithmonë interesante. Mou ka folur për “RT”, duke mos i kursyer batutat për bardhezinjtë. Juventusi ka pësuar vetëm një humbje në shtëpi gjatë këtij sezoni. Ishte 7 nëntori i vitit të kaluar, kur Murinjo dhe Mançesteri i tij befasonin në fund vendasit me golat e Matës dhe Bonuçit (autogol).

“Unë mbetem i vetmi, i cili kam fituar në Torino përballë Juventusit në këtë sezon”, thekson plot krenari trajneri portugez. Marrëdhëniet e tij me tifozët bardhezi nuk janë aspak pozitive.

E kaluara e portugezit si interist ndikon, ndërsa tifozët e “Zonjës së Vjetër” ofenduan gjatë gjithë ndeshjes Murinjon. Ky i fundit duroi deri në fund, riktheu rezultatin dhe iu përgjigj atyre me dorën në vesh dhe ironinë në fytyrë.