Zhoze Murinjo përjetoi një nga momentet më të vështira te Mançester Junajtid gjatë fitores së fundit përballë Njukasëllit me rezultatin 3-2. “Djajtë e Kuq” bënë një përmbysje të çmendur në pjesën e dytë, duke përmbysur dizavantazhin e dy golave.
Nëse në pjesën e parë, portugezi ishte në prag të greminës, djemtë e tij bënë një përmbysje fantastike, duke i siguruar trajnerit vazhdimësinë në stolin e Junajtid.
Në fund të ndeshjes Murinjo shpërtheu në një miks midis festës dhe zemërimit. Ai tha disa fjalë nëpër dhëmbë, me siguri ndonjë përgjigje klasike e tij për kritikët, ndërsa Shoqata e Futbollit anglez ka hapur një hetim kundrejt tij.
Federata ka shpërndarë sot lajmin, duke iu referuar zyrtarisht trajnerit me akuzën e përdorimit të një gjuhe “ofenduese dhe/ose fyese dhe/ose të pahijshme”.
Ai rrezikon dënimin. ndërsa ndeshja e radhës në kampionat është kundër Çelsit dhe trajneri portugez do ketë kohë deri të premten të apelojë vendimin që do të merret kundrejt tij.