Lionel Mesi është bërë mbreti i Barcelonës në shekullin e ri dhe tashmë pakkush e vë në dyshim që argjentinasi është futbollisti më i madh në historinë e klubit blaugrana, që në radhët e veta ka pasur shumë yje, mbi të gjithë Johan Krujf. Gjithsesi, legjenda holandeze tashmë është parakaluar nga Mesi në zemrat e popullit katalanas dhe këtë e vërteton edhe një statistikë e veçantë, publikuar nga “Mundo Deportivo”.
Emri Leo ka kaluar nga i panjohur në më të zgjedhurin për fëmijët e sapolindur. Në vitin 2000, kur Mesi ishte ende i panjohur, vetëm 4 fëmijë u emërtuan Leo në Katalunjë. Në vitin 2017 ishin 443 dhe tani ka më shumë fëmijë me emrin ‘Leo’ sesa ‘Jordi’, që historikisht ka qenë një ndër emrat më të dashur në Katalunjë.
