Absurditet pa kufi, 730 ditë Interi i përmbledh në dy fjali!

0

Largimi i Luçiano Spaletit nga stoli i Interit ishte paralajmëruar prej kohësh, pasi drejtuesit zikaltër kishin nisur kërkimet dhe kontaktet për trajnerin e ri. Gjithsesi, ky fakt nuk do të thotë se Spaleti duhet të shkarkohet me dy fjali në “Twitter”.

“Interi njofton se Luçiano Spaleti nuk do të jetë më trajner i ekipit të parë. Klubi e falënderon trajnerin për punën e tij”, këto ishin fjalët e klubit zikaltër. Një absurditet i vërtetë, të paktën për një trajner që bëri një punë të kënaqshmë në “San Siro” dhe e drejtoi Interin denjësisht për dy vite.

Dy fjali për njeriun që e riktheu Interin në Champions League pas plot gjashtë vitesh mungesë. E njëjta gjë ndodhi edhe këtë sezon, me zikaltrit që e mbyllën kampionatin në vendin e katërt, duke siguruar fazën e grupeve të Championsit përsëri.

Plot dy vite në krye të Interit, ku në çdo moment trajneri italian e ka respektuar në maksimum klubin dhe e ka vendosur mbi çdo lojtar. Mjafton të kujtojmë këtu rastin “Ikardi”. Për të gjitha këto, Luçiano Spaleti meritoi vetëm dy fjali në njoftimin e shkarkimit të tij… Absurditet pa kufi!

You might also like
Leave A Reply

Your email address will not be published.