Nuk ka kurrë qetësi te PSG, klub ndër më të pasurit në planet, gjë që krijon edhe tension, sepse nuk po arrihen objektivat e klubit në Europë, përtej dominimit në Francë.
Në një kohë që mbetet temë dite lufta mes klubit dhe mesfushorit Adrien Rabiot, i pezulluar për faktin se ka refuzuar rinovimin, tashmë del në dritë edhe një çështje e re.
Sipas spanjolles “AS”, Nejmar është grindur keq me presidentin Naser Al-Kelaifi dhe arsyeja është Dani Alvesh.
Veterani brazilian, tashmë 35 vjeç, ka kontratë deri në qershor të këtij viti dhe PSG i ka ofruar rinovim vetëm për një vit, me pagën që do të varet nga numri i ndeshjeve që mbrojtësi do të luajë.
Kjo gjë e ka zhgënjyer pa masë ish-yllin e Barcelonës, i cili ka refuzuar dhe kërcënon me largim.
Kjo ka bërë që Nejmar t’i kërkojë klubit zgjidhje të menjëhershme, pasi Dani Alvesh duhet të qëndrojë në Paris, sa për cilësitë e tij, ashtu edhe për faktin se Nejmar kërkon të jetë i rrethuar nga miq dhe bashkëkombës.
Edhe trajneri Tomas Tuhel është në një linjë me Nejmar, sipas “AS”, duke i theksuar presidentit Al Kelaifi rëndësinë e Alvesh në fushë, por edhe në dhomat e zhveshjes.