Skënderbeu ka pësuar një tjetër humbje në kampionat, pasi është mposhtur me rezultatin minimal 0-1 nga Partizani. “Ujqërit” nuk arritën t’i përgjigjeshin golit të Malës që në minutën e katërt të takimit, madje mund të ishin mposhtur edhe më thellë, nëse Telushi do të tregohej i saktë nga pika e bardhë e penalltisë në pjesën e dytë.
Të dy trajnerët aktivizuan formacionet e tyre më të mira dhe synonin që ta nisnin kampionatin në mënyrën e duhur, por në fund do të triumfonin djemtë e Skënder Gegës, një fitore mëse e merituar.
Tifozët e Skënderbeut ishin shumë të irrituar përgjatë gjithë takimit, duke hedhur shpesh drejt lojtarëve të Partizanit topa dëbore. Gjithsesi, brenda fushës së lojës ishte gjithçka korrekt dhe “FairPlay”, me të dyja ekipet që dhanë maksimumin në fushën e lojës.
Në minutat e fundit, Lorenc Trashi u ndëshkua dhe me karton të kuq, për një ndërhyrje të ashpër në mesfushë. Me këtë triumf, Partizani vazhdon të ruajë kreun e renditjes dhe tregon dhe njëherë tjetër se janë ata favoritët kryesorë për të vënë duart te titulli kampion.
KATEGORIA SUPERIORE – JAVA 19
E premte, më 25 janar, ora 17:00
Stadiumi “Skënderbeu”, Korçë
Skënderbeu-Partizani 0-1
Shënues: Mala 4′
EPISODET
90+’ Mbyllet gjithçka, Partizani triumfon në Korçë
90+5′ Karton i kuq për Trashin, e pranon dhe mbrojtësi
90′ Dalje e paqartë e Hoxhës, shpëton paq porta e Partizanit
85′ Minuta paniku te Partizani, Skënderbeu nuk dorëzohet
81’ Del Telushi, Gega aktivizon sulmuesin Hebaj
75′ Raste të mira për Partizanin, por mungon finalizimi
67′ Edhe Shehi me ndryshime. Del Oto Xhon, në fushë Krasniqi
64’ Panik te Partizani, dëmtohet mesfushori Hila dhe largohet me ambulancë. Në vend të tij Mensah
62’ Taipi i shkëlqyer, duhen dy lojtarë për ta ndalur me faull në mesfushë
57’ Vazhdojnë ndërhyrjet e ashpra, nuk mungon tensioni mes Hilës dhe Muzakës
52′ Telushi humbet penallti! Teqja kupton krahun dhe mban në lojë Skënderbeun
50’ Asani pengohet në limitet e zonës, penallti për gjyqtarin. Shans ideal për “Demat” për të dyfishuar
49’ Skënderbeu më kërkues në minutat e para, gjuajtja e Abazit shkon jashtë
46’ Starton pjesa e dytë, debuton Taipi me fanellën e Skënderbeut. Edhe Hila aktivizohet në vend të Kardozos për Partizanin.
45′ Mbyllet pjesa e parë në Korçë, në fuqi goli i Malës në minutën e 4′
42’ Oto Xhon provon të djathtën, por goditja e tij shkon jashtë
34’ Të gjithë kundër Asanit, Gripshi e përplas në tokë sulmuesin e Partizanit
32’ Goditje e Muzakës, pa probleme për Hoxhën
27’ Karton i verdhë për Gexh, tifozët e Skënderbeut e kanë me Asanin dhe Telushin
23’ Atanda nuk i ndahet Muzakës, ulet ritmi i lojës
19’ Krosim i rrezikshëm i Radash, Muzaka nuk reagon në kohë. Probleme fizike edhe për Belicën
16’ Rifillon takimi pas ndërprerjes, probleme fizike për Telushin
13’ Ndërpritet momentalisht sfida, tifozët e Skënderbeut gjuajnë me topa bore
10’ Goditje e fortë e Telushit, por vetëm këndore! E para e sfidës
8’ Duele të forta në mesfushë, Skënderbeu kërkon të reagojë
4′ Gooooool Partizani! Shënon Mala!
Pasim i shkëlqyer i Asanit nga krahu i majtë dhe Mala i vetëm përballë Teqjas, nuk gabon, duke i dhënë avantazhin “Demave”. Ky është goli i katërt këtë sezon për mesfushorin e talentuar.
2′ Vangjeli bën gjithçka mirë, por gjuajtja e tij pritet nga Hoxha
1′ Starton sfida, topin e parë e shkelmon Partizani
Formacionet e skuadrave
Skënderbeu: Teqja, Vangjeli, Radas, Kaba Sambou, Abazi, Dita, Muzaka, Guexh (Taipi 46′), Gripshi , Hoxhaj, Oto Xhon (Krasniqi 67′). (Në dispozicion: Dajsinani, Taipi, Pëllumbi, Mara, Ajzeraj, Gavazaj, Krasniqi). Trajner: Orges Shehi
Partizani: Hoxha, Ibrahimi, Belica, Rexhepi, Trashi, Atanda, Telushi (Hebaj 81′), Asani, Kardozo (Hila 46′ – Mensah 65′), Mala, Bardhi. (Në dispozicion: Xhika, Çinari, Kalari, Mensah, Kote, Hila, Hebaj). Trajner: Skënder Gega
Gjyqtarë: Andi Koçi, Ermal Barushi, Fatmir Lamaj, Mateo Sadikaj; Gjyqtarë linje: Klajdi Kola, Klodian Shahini
Kartonë të verdhë: Gexh 26′, Dita 52′, Radash 52′ / Telushi 45′
Karton i kuq: Trashi 90+5′
Delegat: Besnik Çela