Perandori i parë dhe i vetëm, Bekenbauer mbush 72 vjeç

0

Një ndër futbollistët më të mëdhenj të të gjitha kohërave, Franc Bekenbauer, feston sot ditëlindjen e 72-të. Lindur më 11 shtator 1945 në Mynih, Bekenbauer e nisi te Mynih 1860 dhe më pas kaloi te klubi i dytë i qytetit në atë kohë, Bajerni, ku u bë futbollisti më i madh gjerman, përveçse mbrojtësi më i madh i gjthë kohërave te Bajerni. Një lider i vërtetë, përtej aftësive si futbollist, ndaj Bekenbauer meritoi nofkën Der Kaiser (“Perandori”), lidhur edhe me emrin e tij Franc, që kujtonte Perandorët e mëdhenj të Austrisë.

Bekenbauer, i konsideruar si kapiteni më i madh në historinë e futbollit, ka luajtur 103 ndeshje për Gjermaninë, duke marrë pjesë në 3 Kupa Bote, ndërsa është i vetmi, së bashku me Mario Zagallon e Brazilit, që ka fituar Botërorin si futbollist dhe si trajner (1974 e 1990).

Si futbollist, Bekenbauer bëri të famshëm rolin e “liberos”, duke avancuar përpara me topin në këmbë dhe duke nisur sulmet e skuadrës së tij. Kjo bëri që Bekenbauer të konsiderohej nga ekspertët e futbollit si mbrojtësi më i kompletuar në historinë e futbollit. Bekenbauer fitoi edhe Euro 1972, sërish si kapiten, ndërsa u tërhoq nga kombëtarja në vitin 1977, në moshën 31-vjeçare.

Në nivel klubi, Bekenbauer luajti thuajse vetëm për Bajernin, duke fituar tre Kupa Kampionesh rresht në periudhën 1974-1976, ndërsa fitoi edhe Kupën e Kupave në vitin 1977, para se të shkonte te Nju Jork Kozmos në Amerikë (në një ekip me Pelen, ëndrra e Kaiserit, 3 tituj kampionë në 4 vite) dhe të luante më pas edhe për një vit me Hamburgun në Bundesligë, ku sërish fitoi titullin.

Dy herë Futbollisti i Vitit, tashmë Bekenbauer është President i përjetshëm i Bajernit të Mynihut.

Kanë hyrë në histori disa nga batutat e tij: “Krujf ishte lojtar më i mirë, por unë isha kampion bote”, “Për të pasur sukses si futbollist, trajner e drejtues, duhet shumë disiplinë, pak fat dhe të lindësh në vendin e duhur, në momentin e duhur”, “Jam njerëzor, jo magjistar. Nëse kërkoni një të tillë, shkoni në cirk”, “Fitorja 7-1 e Gjermanisë ndaj Brazilit nuk duhet të ndodhë më kurrë në një gjysmëfinale Botërori. Edhe si gjerman, ishte e sikletshme ta shihje”, “Pas humbjes ndaj RDGJ-së në Botërorin 1974, ia shtruam me birra, cigare dhe muhabet. Kjo gjë na ndihmoi”.

Image result for beckenbauer

SHPËRNDAJE

PËRGJIGJU

Please enter your comment!
Please enter your name here


CAPTCHA Image
Reload Image