Laçi është një nga ekipet që ka më së shumti të rinj në përbërje. Kurbinasit tentojnë të përfitojnë sportivisht dhe financiarisht nga kjo. Dihet që të rinjtë në hapat e parë nuk mendojnë për paratë, por për të futur këmbët në futbollin profesionist.
Bardhezinjve u shkon për shtat, paguajnë më pak dhe kanë në gjirin e tyre elementë që mund të shiten në të ardhmen. Kurbinasit gjatë këtyre viteve kanë afruar në skuadër lojtarë që i angazhojnë në ndeshje me të rinjtë dhe stërvitjet i bëjnë me ekipin e parë.
Aktualisht janë disa lojtarë që i kanë në fokus dhe ditën e djeshme trajneri Sulejman Starova i ka ndjekur nga afër në ndeshjen e zhvilluar në Fushë-Krujë mes Ilirisë U19 dhe Laçit U19. Krah tij ka qenë edhe drejtori Naim Halili dhe zëvendës trajneri Klevis Hima.
