Kukësi ndryshoi trajneri një ditë më parë. Humbja me Kastriotin u cilësua si përgjegjësi e trajnerit Ramadan Ndreu dhe vendin e tij tashmë e ka zënë Ernest Gjoka, me të cilin verilindorët kanë fituar titullin e parë dhe të vetmin në historinë e tyre.
Tashmë vëmendja është te ndeshja e radhës, që zhvillohet shumë shpejt. Kukësi do të udhëtojë drejt Laçit dhe i duhet me çdo kusht të fitojë, ndryshe edhe vendi i dytë në renditje do të vihej në diskutim. Sidomos nëse humbet.
Shqetësimi i Kukësit tanimë është mbrojtja. Gëzim Krasniqi u dëmtua dje në takimin me Kastriotin dhe e ka mbyllur sezonin, ndërkohë që në sfidat e fundit ka munguar edhe kapiteni Ylli Shameti. Gjirokastriti është një nga pikat më të forta të verilindorëve dhe rikthimi i tij është shumë i rëndësishëm.