Superiorja ka ndalur për momentin, ndërkohë që janë luajtur deri më tani plot 13 ndeshje. Java e fundit ishte mjaft interesante, pasi luanin ekipet me objektiva të njëjta mes tyre. Partizani dhe Skënderbeu kanë dalë të fituarat.
Të kuqtë fituan 1-0 kundër Laçit, kurse Skënderbeu mposhti Flamurtarin po me të njëjtin rezultat. Kështu këto dy ekipe janë distancuar nga ekipet e tjetra, duke e bërë garën për titullin një çështje mes tyre.
Kukësi nuk shkoi më shumë se një barazim 1-1 kundër Teutës dhe mbetet në vendin e pestë në klasifikim. Për durrsakët pika e marrë ishte e kënaqshme, pasi për momentin renditen në vendin e tretë. Europa është objektivi i tyre dhe janë në rrugë të mbarë. Edhe Laçi, pavarësisht humbjes, është brenda objektivave deri më tani.
Surpriza e bukur ishte Kastrioti këtë javë. Tre gola të shënuar në portën e Kamzës dhe krutanët tanimë mund të shpresojnë mbijetesën. Mision i vështirë për ta dhe skuadrën periferike të kryeqytetit. Por gara është e hapur.
Tirana ka vetëm tre pikë më shumë se Kastrioti i vendit të fundit. Luftëtari gjithashtu ka festuar, pasi mundi bardheblutë me përmbysje. Tanimë gjirokastritët kanë pesë pikë më shumë se Kamza dhe gradualisht po tentojnë t’i largohen zonës së ftohtë.
