Situata te Luftëtari vazhdon të “vlojë”. Pas dorëheqjes së Grigor Tavos nga drejtimi i Luftëtarit, Bekim Halilaj, një aksionarët e klubit gjirokastrit ka akuzuar ish-presidentin për mosdorëzim të vulës së klubit në një prononcim për të përditshmen sportive “Panorama Sport”.
Nuk ka vonuar reagimi i zotit Tavo, i cili i ka cilësuar qesharake deklaratat e bëra nga Halilaj, duke e konsideruar mungesën e vulës si diçka të papërfillshme që mund të zëvendësohet me lehtësi. Ndër të tjera, në reagimin e tij ish-presidenti i bluzinjve bën thirrje që aksionarët e mbetur në klub të ndalin shpifjet e mashtrimet dhe të fillojnë të investojnë për të shpëtuar klubin.
Reagim
Ndihem i detyruar të reagoj në lidhje me shpifjet dashakeqe dhe shumë të ulëta që aksioneri i Luftëtarit, Bekim Halilaj ka bere ne adresë time. Është qesharake te dalësh dhe te thuash se Grigor Tavo po dëmton atë Luftëtar qe e ndërtoi me shume mund dhe investim, duke mbajtur sipas tij peng vulën e klubit për te penguar licensimin e Luftëtarit.
I bej thirrje aksionerëve apo aksionerit Halilaj, qe nëse ka ndërmend të investoje, ta bëjë sa më parë. Kjo pasi koha nuk pret. Nuk është aspak e vërtetë se unë mbaj peng vulën e klubit, kjo është një shpifje e ulët sepse vula është në administratën e Luftëtarit dhe nuk është justifikim që ka të bëjë me licensimin.
Luftëtari është një shoqëri aksionere me administrator dhe staf dhe si e tillë funksionon më së miri. Edhe sikur vula të mungonte, është shumë e thjeshtë të behet një e re. Vula mbahet nga personi që ka të drejtën e firmës në një shoqëri.
Në vend që të shqetësohemi për fatin e skuadrës thjesht po mundohemi të krijojmë ca tymnaja që nuk bëjnë gjë tjetër veçse tregojnë qëllimet e njerëzve. Luftëtari nuk mbahet as me shpifje dhe as me mashtrime, Luftëtari ka nevojë për investim.