Teuta ka paralajmëruar prej kohësh revolucion në prag të sezonit të ardhshëm, por ky revolucion nuk do të ndalet te skuadra, që do të ribëhet, pasi thuajse gjithë lojtarët e sezonit të shkuar janë lënë të lirë.
Klubi durrsak do të pësojë ndryshim total edhe në aspektin organizativ, sepse të shtunën bordi drejtues i klubit durrsak do të mblidhet për të ndryshuar statusin në shoqëri aksionere, raporton Supersport.
Aktualisht statusi i klubit është shoqatë sportive dhe me kalimin në statusin shoqëri aksionere, do të ndryshojnë edhe mekanizmat e funksionimit. Pas miratimit që do t’i bëjë bashkia ndryshimit, pritet që klubi të vendosë edhe për të caktuar më pas edhe administratorin.
Për sa i përket skuadrës së sezonit të ardhshëm, klubi nuk po lëviz ende, por mësohet se dy objektiva kryesorë janë lojtarët afrikanë të skuadrës së Besëlidhjes, Lansinet Sidibe dhe Seku Kamara.