PSG ishte klubi ideal për të fituar para dhe tani klubi francez e ka të pamundur për të larguar disa lojtarë. E ndërsa Neymar ishte shumë shpesh nën kritika për festat e tij të shumta dhe jetën e shfrenuar, situata ka ndryshuar dhe kritikët kanë gjetur një objektiv të ri.
Ai mbërriti në Parkun e Princave në vitin 2012 kur ishte 20 vjeç, ndërkohë që nga klubi parizian arkëtoi më shumë se 100 milionë euro në favor të rrogës dhe shpërblimeve. Marco Verratti është “paraziti i ri” që PSG-ja nuk mund ta “heqë qafe” edhe pse i është thënë qartë se nuk llogaritet më në ekip.
Se çfarë lloj jete jeton italiani në qytetin e dashurisë, shpjegohet më së miri nga ish-futbollistët Jerome Rothen dhe Cristophe Dugarry. “Nuk mund të dërgosh një mesazh të tillë në dhomën e zhveshjes, nga një djalë (Verratti) që luan 60% të ndeshjeve, i cili zakonisht është i lodhur në minutën e 60-të kur ritmi është i lartë, i cili kalon kohë në festa, vetëm pi dhe pi duhan…” tha ai Rothen vazhdoi:
“Dhe këto janë gjëra që dëmtojnë imazhin e klubit. Disa gjëra nuk je i detyruar t’i bësh. Kur të gjitha të këqijat në PSG pasqyrohen në imazhin e përcjellë nga yjet e tij, pjesë e të cilit është edhe Verratti, atëherë është dramatike.” Edhe Christophe Dugarry, ish-sulmuesi i Milanit dhe kampion bote në vitin 1998 me Francën, nuk e kurseu italianin:
“Verratti ka mbaruar për mua. Ai do të mbushë 31 vjet. Ai ka qenë atje për 11 vjet, ai kurrë nuk e ka kuptuar se si është jeta dhe karriera e një futbollisti të lartë. Është një zgjedhje jete. E zgjodha edhe unë, isha një futbollist i mirë, por unë isha i çuditshëm”, tha Dugarry. /Elio Hajdari-Sport Ekspres/