Me Partizanin në kampionat shënoi vetëm një gol, ndërkohë që këtë verë pati “luftë” për ta larguar. Flasim për Edgar Çanin, sulmuesin që ka luajtur në Serinë A dhe me kombëtaren shqiptare. Gjithsesi duhet pranuar se fatura financiare për të nuk ishte e vogël.
Tashmë Çani është kthyer në Itali dhe do të luajë në Serinë C me skuadrën e Vibonezes. Ditën e djeshme, në një miqësore kundër Vigor (klub i Serisë D), sulmuesi shqiptar ka shënuar golat e fitores. Ai e nisi nga stoli.
Takimi ishte barazim 1-1 dhe në minutën e 55-të dhe të 76-të Çani ka realizuar dy herë dhe i ka dhënë triumfin skuadrës së tij. Sulmuesi do kërkojë të tregojë që ende ka për të dhënë në futbollin e luajtur dhe se aventura e tij me Partizanin ishte vetëm një “ëndërr e keqe”.