Liria e drejtuar nga Bledi Shkëmbi kishte shansin të kapte përkohësisht kreun e tabelës sot, por u ndal te barazimi 2-2 në derbin ndaj Vëllaznimit, në një sfidë të çmendur, me Lirinë që shkoi në pushim në avantazhin 2-0 dhe me miqtë që shënuan dy gola në pjesën e dytë dhe mund të fitonin.
Pas ndeshjes trajneri i Lirisë, Bledi Shkëmbi, nuk e fshehu zhgënjimin, duke qortuar skuadrën për euforinë, ndërsa paralajmëron përforcime: “Luajtëm një pjesë të parë shumë të mirë, shënuam dy gola dhe luajtëm mirë, por në pjesën e dytë vuajtëm dhe u pa qartë mungesa e eksperiencës, aq sa rrezikuam të humbnim. Gjithsesi, faza e parë e sezonit ka qenë shumë e mirë, ndoshta kemi fluturuar pak lart këto ditë, duhet të qëndrojmë me këmbë në tokë. Kemi pasur edhe disa mungesa, ndaj shpresoj që deri në dhjetor të qëndrojmë sa më lart në renditje dhe më pas të shohim për përforcime”.