Te Kukësi tanimë kanë një detyrë të vështirë: të largojnë lojtarët që nuk janë në planet e stafit teknik. Trajneri Armando Cungu e ka pasur mundësinë ta shohë ekipin nga afër dhe të krijojë një ide për të gjithë lojtarët. Kështu, drejtuesit tani do punojnë për të mbyllur marrëveshjet me ata që shkodrani nuk i ka në plane.
Lista është e gjatë dhe në të bëjnë pjesë edhe lojtarë të afruar gjatë kësaj vere. Edhe për lojtarët është momenti i duhur për ta mbyllur me verilindorët, paçka se mund të kenë kontratë edhe për ndeshjet e Europës.
Duke qenë se sezoni i ri nis së shpejti, pritet që edhe ata të mendohen mirë dhe të shohin për ndonjë ekip tjetër sa janë në kohë. Tashmë priten vetëm zyrtarizimet e lëvizjeve në dalje në merkato.