PSG tregoi se nuk varet tërësisht nga yjet e saj Mbape e Nejmar, pasi mposhti lehtësisht Sent Etien, 4-0.
Trajneri Tomas Tuhel mendoi për Champions League dhe e la pushim Nejmarin, për shkak të ndeshjeve me kombëtaren, ndërsa Mbape ishte i pezulluar.
Gjithsesi, Julian Draksler përfitoi nga mungesa e yjeve dhe më në fund gjeti formacionin, duke shënuar golin e parë të ndeshjes pas 22 minutash lojë.
Në pjesën e dytë Kavani shënoi nga pika e bardhë, Di Maria shënoi të tretin dhe i riu Musa Diabi kompletoi festën, me golin e parë personal në futbollin profesionist.
Fitorja mban PSG me pikë të plota, me 5 fitore në po aq ndeshje, rekord për trajnerin Tomas Tuhel, sepse asnjë trajner i PSG-së nuk e kishte nisur me ecuri kaq perfekte.