Edi Reja vijon normalisht punën për ndeshjet me Islandën dhe Moldavinë, ndërkohë që sikurse dihet një pjesë e mirë e lojtarëve që janë nën urdhrat e trajnerit italian janë futbollistë të Shqipërisë U21. Së fundmi ka edhe një tjetër lojtar që do të dalë në stërvitje.
FSHF, përmes zyrës së shtypi ka bërë me dije se me ekipin ditën e sotme do të bashkohet edhe mesfushori Jurgen Çelhaka. I riu, i cili është pjesë e Tiranës dhe aktivizohet me të rinjtë, është pjesë e Shqipërisë U20.
Çelhaka ishte një nga elementët e rinj që Tirana e “blindoi” në verë me kontratë afatgjatë, por nuk ka pasur hapësira në ekipin e parë. Për të stërvitja me kombëtaren dhe trajnerin Edi Reja do të jetë një motivim për të punuar më shumë.