Pas 31 vitesh, Fejnordi zbarkon përsëri në Tiranë. Por këtë herë përballë nuk do të ketë Partizanin, po një klub të madh si Roma. Një nga protagonistët në fushën e lojës në përballjen me holandezët, Artur Lekbello, kujton në studion e emisionit “Ora Sport” në “Ora TV” ndeshjen me Fejnordin. Ish-portieri i Partizanit ka dhënë së fundmi edhe një intervistë me gazetarët holandez dhe zbulon se Fejnordi e sheh si fat zhvillimin e finales në Tiranë.
“Ata e njohin Tiranën, por e njohin në daljen e Shqipërisë nga tranzicioni. Ata i shokoi. Fejnordi beson te Tirana. Para një muaji erdhën 7 gazetarë që intervistuan në Tiranë dhe merrnin mendime të ndryshme. Ata shpresonin që ekipi i tyre do të dilte në finale, megjithatë i druheshin Olimpikut të Marsejës. E quajnë si fat në Tiranë, e quajnë si besim në vetvete. Ndeshja mes Partizanit dhe Fejnordit? Është ndryshe ’91-shi me tani. Atëherë komisari i fushës detyroi të vinte një sponsor dhe u afrua një i bukës nga Roterdami që me dashamirësi na sponsorizoi“, ka thënë Artur Lekbello./Halit Delibashi-Sport Ekspres/