“Do mendohem, do flas me drejtuesit. Objektivat e klubit janë më të rëndësishme”. Bledi Shkëmbi e pranoi pas ndeshjes me Laçin që po mendon largimin nga Teuta.
Korçari e tha hapur se mban përgjegjësi për gjithçka ndodh në ekipin e tij, ndërkohë që ka lëvizje në kampin durrsak.
SportEkspres.com mëson se presidenti Edmond Hasanbelliu nuk ka qëndruar duarkryq. Nuk ka kohë për të humbur, ndeshja e radhës luhet të mërkurën dhe sërish me një ekip pretendent për vendin e tretë, Flamurtarin.
Sigurisht gara është e hapur deri në fund, por duhet që durrsakët të kthehen te rezultatet pozitive menjëherë.
Ajo çka mësohet së fundmi ka të bëjë me faktin se drejtuesit e Teutës kanë nisur bisedimet me disa trajnerë. Nuk është çudi që nesër Shkëmbi ta mbyllë aventurën e tij me “Djemtë e Detit”.
Mjafton që presidenti Hasanbelliu të gjejë trajnerin e duhur, por natyrisht pengesë serioze mund të jetë ana financiare dhe fakti që janë vetëm pak ndeshje deri në fund të sezonit dhe një trajner i ri do kishte nevojë për kohë për të njohur grupin.