Kristiano Ronaldo vendosi të largohej nga Reali i Madridit në verën e kaluar për të kaluar në Serie A. Portugezi po tregon cilësitë e tij me Juventusin, ndërsa largimi i tij e ka dobësuar ekipin e Solarit.
Diçka normale dhe e pritshme duke marrë parasysh kualitetin e portugezit, por një tjetër lojtar ka “rilindur”. Flasim për Karim Benzema, i cili tani po shijon një futboll ndryshe dhe shumë… gola.
Francezi ka dhënë një prononcim për “France Football”, aty ku komenton ndryshimin e ndodhur. Tashmë është më i lirë në fushën e blertë dhe po bën detyrën e tij kryesore, që është shënimi i golave.
“Me Kristianon në ekip, unë luaja për të. Kërkoja gjithmonë mënyrën për ta ndihmuar të shënonte sa më shumë gola. Isha gjithmonë violina e dytë, ndërsa tani është ndryshe. Më duhet të marr më shumë përgjegjësi dhe duhet të jem lideri i ekipit. Tani ndihem më lirshëm, jam më i lumtur dhe ndihem më i rëndësishëm për Realin e Madridit”, përfundon sulmuesi 31-vjeçar.