I pakënaqur me reagimet e shtypit, Shpëtim Duro: E kanë bastarduar me Kukësin

0

Kukësin e pret një ndeshje e vështirë ndaj Partizanit ditën e nesërme në “Air Albania Stadium”. Verilindorët vijnë pas një hapi fals të hedhur në mesjavë kundër Luftëtarit, që ka sjellë edhe reagime të forta për ekipin e që këtë sezon pretendon titullin kampion.

Trajneri Duro ka qenë i pranishëm në konferencën për shtyp, ku ka folur për përballjen e radhës, ndërsa nuk ka lënë pa përmendur edhe atë barazim ndaj Luftëtarit. Kreut të pankinës së Kukësit nuk i kanë pëlqyer aspak fjalët pas ndeshjes me bluzinjtë dhe e konsideron si bastardim atë çfarë shtypi ka shprehur pas atij barazimi.

“Me një skuadër si Partizani do të jetë ndeshje interesante. Zhvillimi në impiant modern i shton bukurinë rëndësinë këtij takimi. Pastaj edhe rezultati sepse fillon gjysma e dytë e kampionatit dhe gjithçka bëhet më e vështirë për të arritur në objektivin final. Është e drejtë që nuk morëm maksimumin ndeshjen e parë por çdo ndeshje ka historinë e saj dhe janë gjëra që ndodhin në futboll. Kemi parë diçka të tillë edhe në kampionate europiane, por është e rëndësishme që pas asaj paraqitje duhet të reagojmë. Kam parë shtypin këto ditë dhe pritshmëritë ishin që duhet të fitonim, por është bastarduar sikur Kukësi e ka lënë fare ndeshjen dhe nuk ka luajtur aspak. E kam parë e stërparë ndeshjen dhe e di që nuk kemi qenë aty ku duhet. Megjithatë, kemi pasur pesë apo gjashtë raste të pastra për të shënuar. Këto i kanë harruar fare dhe merren me vetëm dy tri raste të Luftëtarit sepse gjithmonë ai që është më inferior ka rëndësi më shumë ndaj një ekipi më të fortë.”

Mungesat e Partizanit

“Nuk kemi asnjë avantazh. Nuk i marr parasysh aspak mungesat e Partizanit sepse ata janë një skuadër me të gjitha lojtarët me vlera sepse janë Partizani. Kemi luajtur dy herë me Partizanin dhe kanë qenë me ekip super të plotë dhe në kemi arritur të marrim rezultat më të mirë se ata. Dhe kjo është ajo që më frikëson, pasi është krijuar ideja që Partizani ka mungesa. Unë i vlerësoj ata që mungojnë te Partizani, por i vlerësoj shumë edhe ata që janë në stol sepse janë lojtarë me pagesa të larta. Partizani ka një skuadër që çdo lojtar ka shumë vlera. Unë jam trajner që i pranoj të tre rezultatet. Futbolli është lojë e tillë dhe luajnë dy skuadra rivale. Synimi jonë është fitorja, por në këtë lojë çdo rezultat është i pranueshëm.”

Merkato

“Skuadra është e plotë dhe nuk asnjë dëmtim. Jam pak i zhgënjyer sepse kemi bërë një stërvitje me kushte shumë të mira dhe nuk e prisja të dështonim ndeshjen e parë. Ndryshimi i ambientit dhe terreneve ndikon në ato ndeshje. Kemi kapacitetin dhe alternativat për t’i përballuar të gjitha ndeshjet me sukses. Kam kërkuar dy futbollistë pas largimit të Kitanovskit dhe Dakut. Njërin e pres këto ditë, nëse po punon klubi për çështje vizash. Është futbollist që e njoh dhe vjen nga Afrika. Kam kërkuar edhe një futbollist tjetër nga Shqipëria dhe nëse do të vinte do të ishte një ndihmesë jo e vogël, por theksoj se edhe kështu siç jemi kemi kapacitetin e duhur për të përballuar aktivitetin.”

Tifozët

“Është e çuditshme sepse e kam thënë se Kukësi në ndeshjet me Tiranën dhe Partizanin ka qenë mirë për sa i përket rezultateve. Fakti që ka pasur më shumë tifozë kundërshtarë nuk ka ndikuar, por mendoj se kjo i bën mirë për sa i përket ngacmimit. Kemi pasur ndeshje që kemi luajtur pa tifozë dhe kjo nuk na ka ndihmuar aspak për të dhënë maksimumin. Shpresoj të ketë sa më shumë tifozë të Kukësit nesër. E di që edhe Partizani do ketë shumë tifozë.”

Të gjithë për titull

“Objektivat i kemi përpara dhe është ndryshe kur del nga objektivat. Të harrojmë Luftëtarin dhe të vazhdojmë. Përderisa nuk kam hyrë në merkato tregon se skuadra është e plotë. Nuk përjashtoj asnjë skuadër të pretendojë për titull kampion Tirana partizani Bylis, Laçi, Teuta. Përderisa jemi në vend të parë dhe unë s’po fshihem se jemi në vend të parë dhe po flas si ekip në vendin e parë. Kemi pasur një fillim të mirë e ma pas disa oshilacione. Në Laç kemi pasur gjashtë mungesa. U rikthyem përsëri. Siç kemi bërë ne gabime, kanë bërë të gjithë pavarësisht se të gjithë kanë bërë investime të mëdha si Tirana e Partizani e skuadra të tjera. Të jemi rivalizues deri në fund për objektivat.”

Trysnia e skuadrës

“Të dy skuadrat vijmë pas rezultatesh negativë në ndeshjet e para. Sormani është trajner i sapoardhur dhe ka ambiciet e veta. Ka të drejtë që kërkon agresivitet dhe unë e kërkoj të njëjtën gjë te skuadra ime. Presioni është te të gjitha skuadrat kryesues dhe jo më kot skuadrat i kanë ndërruar trajnerët. Presioni është te të gjitha skuadrat. Ka momente që trajneri ndërrohet edhe gabimisht. Unë ka gjashtë muaj te Kukësi dhe kemi punuar në një ambient të qetë pa asnjë lloj presioni. Padiskutim që kemi pasur edhe kontakte jo të rralla me presidentin dhe ai ka të drejtë të kërkojë maksimumin. Duhet të them se deri tani kam punuar në një situatë shumë normale. Presidenti është pronar dhe investon dhe ka të drejtë të heqë gjithë skuadrën. Unë ultimatumin nga presidenti e kam marrë që kur kam nisur punën me Kukësin. Objektivi minimal është një nga dy vendet e para dhe Kupa. Kemi bërë punë të jashtëzakonshme dhe jemi në atmosferë shumë të mirë.” /Sport Ekspres/

You might also like

Leave A Reply

Your email address will not be published.

This site uses Akismet to reduce spam. Learn how your comment data is processed.