Ndryshe nga ç’thuhet kohët e fundit, Zidan e ka në planet e tij Modriç edhe në sezonin e ardhshëm. Kroati prej kohësh ka qenë i lidhur me Interin. Në verë zikaltrit ishin shumë pranë tij, megjithatë nuk arritën ta finalizonin operacionin. Fituesi i Topit të Artë ka përjetuar një sezon jo shumë pozitiv me Realin dhe zërat për largimin e tij sa vijnë e shtohen.
Sipas spanjolles “Cadena Cope”, Zidan ka parë situatën e dyshimtë mbi të ardhmen e mesfushorit dhe ka kërkuar një takim kokë më kokë me Modriç. Në bisedë trajneri francez i ka bërë të qartë lojtarit se është në planet e tij edhe për vitin e ardhshëm dhe i ka siguruar vendin e titullarit. Gjithashtu Zidan mësohet të jetë shprehur se mesfushori do të ketë më pak detyra mbrojtëse. Ai do të fokusohet në organizimin e manovrës së sulmit.