Zenga: Stoli kuqezi? Të shpresojmë, s’varet vetëm nga unë!

0

Ka drejtuar 16 skuadra në 16 vjet karrierë në stol, por kurrë një kombëtare. Kuqezinjtë e tërheqin: “Ka edhe të tjerë në valle, të shohim. Do të më pëlqente shumë të stërvisja Shqipërinë”

Anton Cicani

Valter Zenga është gati për Shqipërinë. Pas bisedës me presidentin e FSHF-së, Armand Duka, ish-portieri i Italisë dhe Interit, pret me padurim që të arrihet akordi për të drejtuar për të parën herë në karrierën e tij në stol, një kombëtare futbolli. Aventura e tij e fundit në Championship, pra në kategorinë e dytë angleze, ishte një dështim total, por Zenga është nga ata që nuk e ndjen presionin dhe për “Sport Ekspres” rrëfen: “Po, më ka kontaktuar federata shqiptare e futbollit dhe presidenti Armand Duka, ku kemi folur dhe shpalosur idetë tona. Tani do të azhurnohemi. Të shpresojmë. Do të më pëlqente shumë, por të presim. Nuk mund të them më shumë se kaq. Nuk varet vetëm nga unë. Ka të tjerë kandidatë me autoritet”, tha Zenga.

Udhëtimet – Të drejtosh 16 skuadra në 16 vjet karrierë si trajner nuk është një fjalë goje, madje do të ishte impenjuese edhe për shumë timonierë të tjerë, të cilët do të ndiheshin të lodhur dhe gati për një kombëtare… Pikërisht kjo është ideja e Valter Zengës, që dikur priste topat që i vinin drejt portës që duhet të mbronte, ndërsa sot i duhet të presë “ofertat”, por jo më në kuptimin figurativ, por atë të drejtpërdrejtë.

Miku magazinier – Dikur, mundësia për të parë botën dhe për t’u njohur me kulturën dhe zakonet e ndryshme ishte thjesht një udhëtim imagjinar ose ndoshta thjesht një farë lexim i një libri të shkruar nga lundërtarë të ndryshëm, për të imituar figura si Kristofor Kolombi apo Ameriko Vespuçi… E thërrasin “Njeriu Merimangë”, sepse kërcente deri në këndin e portës dhe përpiqej të grushonte ndonjëherë edhe të pamundurën.

Dhe, ashtu sikur dikur “krijonte rrjetën” e tij, ashtu edhe ka lëvizur në çdo cep të botës, duke shkelur tre kontinente (Amerikë, Europë dhe Azi). Nuk jemi në një “National Geografic”, por në realitetin e atij që në moton e tij ka fjalinë “Të stërvitësh është një stil jete”, ashtu sikurse dhe kursi i tij për trajnerët e rinj. Aty, Zenga do të rrëfente edhe një mënyrë për të kuptuar një ambjent të ri, ku do të niste punë: “Gjëja e parë që bëj kur shkoj në një ambient të ri, skuadër të re, është që të dal për darkë me magazinierin dhe e dini pse? Sepse është i vetmi që është aty prej 20 vjetësh dhe i vetmi që mund të thotë gjithçka”. Ky është një ndër sekretet e vogla të Valter Zengës, që përtyp futboll prej më shumë se 40 vjetësh.

Vojvodina e mallkuar – Sigurisht, nëse do të kthehej mbrapa në kohë, sigurisht flasim për sa i përket karrierës së tij si trajner, pasi si futbollist do të duhej ndoshta edhe më shumë se një vëllim… “Atë mbrëmje të mallkuar s’dua ta kujtoj, por nëse do të shkruaja një libër, do të kisha çfarë të thoja”. Pikërisht eliminimi ndaj Vojvodinës në turin e tretë të kualifikueseve për Europa League (humbje e turpshme 0-4 në “Marassi”) solli edhe shkarkimin e tij nga pankina e dorianëve, duke i hapur rrugën Vinçenco Montelës. Kanë kaluar dy vjet nga ajo ditë, ndërsa sot Zenga ndihet më i fortë.

Goditjet e dënimit – Një tjetër armë e fortë e Valter Zengës janë goditjet e dënimit. Në fakt, skemat e tij, që fillimisht ngjallën shumë ilaritet edhe te Katania, në Siçili, më pas rezultuan se ishin efektive. Sigurisht, i bëri më pak të komplikuara, por që gjithsesi “vrastare”.

Karriera si trajner

1998-1999            N.E. Revolution

2000-2001            Brera

2002-2003            Nacional Bukuresht

2004-2005            Steaua Bukuresht

2005-2006            Crvena Zvezda

2006-2007            Gaziantepspor

2007                     Al-Ain

2007                     Dinamo Bukuresht

2008-2009            Katania

2009                     Palermo

2010-2011            Al-Nasr

2011-2013            Al-Nasr

2013-2014            Al-Xhazira

2015                    Sampdoria

2015-2016            Al-Shab

2016                    Ulvërhempton

 

You might also like
Leave A Reply

Your email address will not be published.