Milan dhe Roma po përplasin brirët momentalisht në “Olimpico”, në një sfidë direkte për zonën Champions. Ndeshja ka nisur me verdhekuqtë më kërkues, por ka qenë ekipi i Gatuzos që ka gjetur golin e avantazhit.
Kristof Piatek! Po, është përsëri ai, i cili shënon në debutimin e tij si titullar në Serie A. Pas paraqitjes mbresëlënëse në Kupën e Italisë, ku shënoi dy herë kundër Napolit, tashmë shënon përsëri. Një gol, i gjithi i blerjeve të janarit.
Lukas Paketa, tregohet fenomenal në krah, teksa pasi rikuperon topin, driblon Pelegrinin dhe kroson për Piatek. Ky i fundit, i vjedh kohën mbrojtësve të Romës dhe me një gjakftohtësi prej vrasësi, i jep avantazhin ekipit kuqezi. Goli i 14-të në Serie A për “pistoletën” polake.