Dy vëllezërit Klajdi dhe Azis Papa, të cilët prej vitesh kontribojnë për Naftëtarin, duket se në sezonin e ardhshëm do të vijojnë të ndarë nga njëri-tjetri. Sulmuesi Azis Pepa, i cili në sezonin e kaluar ishte edhe autor i tre golave, ka vendosur që të kontribuojë sërish për skuadrën e vendlindjes, edhe në Kategorinë e Dytë.
Krejt e kundërta po ndodh me vëllain e tij Klajdi Pepa, i cili luan si mbrojtës krahu dhe në këtë periudhë është kontaktuar nga disa skuadra të njohura të Kategorisë së Parë, ndaj pritet që gjatë kësaj vere të jetë larg Naftëtarit, edhe pse stafi teknik kuçovar e ka bërë të qartë se dy vëllezërit Pepa konsiderohen si dy futbollistë shumë të rëndësishëm dhe të vlefshëm për sezonin e ri.
Gjithsesi, Klajdi Papa e ka bërë të qartë në një prononcim për Sport Ekspres se sezonin e ardhshëm nuk do të jetë në Kuçovë. “Më vjen keq që do të lë Naftëtarin, por mendoj se ka ardhur koha që unë të luaj në një kampionat të një niveli më të lartë se Kategoria e Dytë. Në ditët në vazhdim do të vendos për skuadrën time të re, ndërsa më kënaq fakti që vëllai im Azizi do të jetë pjesë i Naftëtarit si përfaqësues i familjes sonë”, është shprehur mbrojtësi 24-vjeçar Klajdi Pepa.
Edi Spahiu