Shqipëria e ka mbyllur me fitore vitin 2022. Ndeshja e fundit për kuqezinjtë për këtë vit kalendarik ishte ajo kundër Armenisë, të cilën e fitoi me rezultatin 2-0. Skuka ka shënuar sot golin e tij të parë me Kombëtaren, duke justifikuar besimin e Rejës për ta nisur nga minuta e parë. Ndërkohë në pjesën e dytë shënoi edhe Kristjan Asllani, i cili u tregua i saktë nga pika e bardhë e penalltisë. Pas përfundimit të ndeshjes, protagonistët kanë dhënë intervistat e tyre për “Supersport“.
Reja: “Sa i përket ndeshjes së fundit apo jo, këtë nuk e di akoma. Duhet të shohim. Është e rëndësishme që e mbyllëm me fitore. Djemtë treguan temperament dhe dëshirë të madhe. Kur ka lëvizje në sulm loja bëhet edhe më e lehtë për mesfushën. Luajtëm mirë, jam i kënaqur sot. Ky duhet të jetë shpirti i Shqipërisë, me ose pa mua, pasi energjia e djemve është e rëndësishme në ekipin kombëtar, njësoj si dëshira dhe lidhja me fanellën.
Lojtarët e Superiores? I kam ndjekur këta lojtarë gjatë kampionatit. Ka shumë lojtarë që më kanë rënë në sy, ka lojtarë që mund të bëjnë mirë në Kombëtare. Mua më pëlqen të bëj edhe stërvitje apo seleksionime javore apo mujore, gjithmonë nëse më lejojnë klubet. Nuk e di nëse do të vazhdoj, por kushdo që do vijë, do të gjejë një punë të ngritur, do gjejë tavolinën plot dhe shumë lojtarë të talentuar, do ketë mundësinë të zgjedhë. Nëse do jem unë, i kam idetë e qarta. Detyra ime ishte të rrisja vlerat e lojtarëve, mendoj se kemi lojtarë që janë të gatshëm për të luajtur me Kombëtaren. Nëse do të vazhdoj si trajner i Shqipërisë, e di se ku duhet të ndërhyj.
Të gjithë janë të aftë, Skuka tregoi vlerat e tij, edhe Hadroj ka vlera në aspektin dinamik dhe atë të rezistencës, por duhet të përmirësojë diçka në aspektin teknik. Ka edhe shumë të tjerë. Edhe Bitri po bën mirë, në lartësi janë edhe lojtarë të tjerë që nuk i grumbullova këtë radhë. Cara është lojtar interesant, ka teknikë, lëvizshmëri dhe ritëm. Janë lojtarët që duhet mbështetur dhe duhen integruar në ekipin kombëtar. Kemi rreth 40-50 lojtarë që mund të jenë pjesë e Kombëtares. Goli i parë? Kur ke kohën në dispozicion për të punuar, bën edhe gjëra të tilla, por ka raste që lojtarët i harrojnë lëvizjet që përgatisim. Përgatitëm disa lëvizje, lojtarët i memorizuan dhe i bënë në ndeshje. Sa bukur do ishte nëse do kishim më shumë kohë për të punuar së bashku. Kemi kualitet, e treguam në lëvizjet e sotme. Fizikisht jemi mirë, por kemi nevojë për t’u përmirësuar në aspektin taktik”.
Ardian Bajrami: “Kështu ne të rinjtë fitojmë më shumë vetëbesim. Integrohemi më shumë me grupin. Na ndihmojnë këto ndeshje. Kemi shumë kualitet ne të rinjtë. Po luajmë më klube të mëdha, si Broja, Asllani dhe unë te Benfika. Kemi shumë potencial. Duhet të jap gjithmonë maksimumin. Duhet të dëftoj në stërvitje që jam gati. Në Kombëtare kemi shumë rivalitet”.
Asllani: “Emocion shumë i bukur të shënosh gol me Kombëtaren. Të gjithë çunat e vegjël e kanë ëndërr këtë gjë, unë e bëra sot. Por më e rëndësishmja është fitorja. Fituam pas shumë kohësh dhe i kënaqëm tifozët. Zgjedhjet i bën trajneri, unë uri kam gjithmonë. E kam shumë qejf atë topin. Edhe Skukës i thashë para ndeshjes, nisu gjithmonë pas shpinës së mbrojtësit, sepse e kam qejf atë top. Jam i lumtur që bëri golin e parë”.
Skuka: “Kam shumë besim te vetja dhe isha i sigurt që do bëja mirë, por jo me gol. Jam ndjerë shumë mirë. Çunat më kanë pritur mirë, si të vegjëlit ashtu edhe të vjetrit. Edhe stafi, dukej sikur nuk isha në Kombëtare për herë të parë. Titullar në Kombërare? Duhet shumë, shumë punë, duke parë edhe kolegët e mi në sulm. Duhet të përmirësoj gjendjen fizike, duhet ta rris shumë”.
Cara: “Do na i lejojnë t’i marrim fanellat në shtëpi? Normale që do na i lejojë, sepse këto janë kujtim. Ishte një debutim me Kombëtaren dhe do na duhen në shtëpi si kujtim. Kur të na jepet mundësia do vijmë të bëjmë maksimumin. E presim me padurim një ftesë”./Halit Delibashi-Sport Ekspres/