Mbrojtësi koreano-jugor Jang Hjun-So është përjashtuar përjetë nga kombëtarja e Koresë së Jugut dhe ka marrë një gjobë, e cila shkon diçka më shumë se 20 mijë paundë. Arsyeja e gjithë kësaj ishte falsifikimi që Jang i kishte bërë detyrimit të tij për të shkuar në ushtri.
Përveç njerëzve me aftësi të kufizuara, të gjithë njerëzit në Korenë e Jugut duhet të kryejnë shërbimin ushtarak. Periudha është dy-vjeçare dhe e vetmja mënyrë për të shpëtuar nga ky detyrim është duke fituar një medalje ari në Olimpiadë ose në Lojërat aziatike.
Gjithsesi, ekziston dhe një mënyrë tjetër për ta evituar shërbimin për sportistët. Këta të fundit duhet të kalojnë katër javë trajnime ushtarake bazë dhe të ndërmarrin më shumë se 500 orë shërbim në komunitetit gjatë një periudhe trevjeçare. Jang, i cili ka 58 ndeshje dhe ishte pjesë e ekipit që fitoi medaljen e artë në Lojrat aziatike 2014 në Inçeon, ka pranuar që ka falsifikuar shënimet që tregojnë sa orë të shërbimit të komunitetit ai ka kryer.
Federata e futbollit e Koresë së Jugut u takua të enjten për të vendosur se si të ndëshkojë 27-vjeçarin, i cili luajti në të gjitha tre ndeshjet e Koresë në Kupën e Botës në Rusi. “Jang është skualifikuar në mënyrë të përhershme për të luajtur për ekipin kombëtar dhe ka marrë një gjobë”, tha zëdhënësi i federatës. Ministria e sporteve i ka dhënë Jangut edhe pesë vite të tjera shërbim të detyrueshëm.
Jang kishte kërkuar falje të hënën dhe tha se do të ndërmarrë shërbimin e kërkuar të komunitetit. “Më vjen keq që kam zhgënjyer të gjithë për një çështje kaq të turpshme”.
Ndërkohë, të gjithë e kujtojnë muajin shtator, ku lojtari i Totenhem, koreano-jugori, Heung-Min Son rrezikonte të bënte një pauzë dy-vjeçare me karrierën e tij, sepse duhet të kryente shërbimin ushtarak në atdheun e tij. Për ta evituar këtë gjë, kapiteni i kombëtares së Koresë së Jugut duhet të fitonte medaljen e artë në Lojërat aziatike dhe fundi ishte i lumtur, pasi Koreja fitoi në finale ndaj Japonisë.