Në huazim nga Lozana, për t’u provuar te të rinjtë, Andi Zeqiri nuk do të qëndrojë në Itali, pasi ka mbyllur aventurën te Juventusi.
Sulmusi i talentuar 18-vjeçar do të kthehet në Zvicër, ku Lozana i garanton një vend në skuadrën e parë për sezonin e ri.
Kjo duket arsyeja që ka çuar te divorci me Juventusin, të paktën sipas menaxherit Valter Fernandez, i cili ka shpjeguar se Juventusi dëshironte ta mbante Zeqirin, por ishte vetë lojtari që preferoi të kthehej në Lozanë, për të luajtur në ekipin e parë, në Superligë.
Në sezonin e shkuar Zeqiri ishte titullar me skuadrën Primavera të Juventusit, drejtuar nga Fabio Groso, duke shënuar 9 gola në 29 ndeshje. Juventusi i ofroi edhe një vit huazim, por Lozana dëshironte një vendim përfundimtar: blerje, ose kthim në shtëpi.