Përfaqësuesja e Kosovës e ka gjithmonë derën e hapur për talentet me origjinë kosovare nëpër Europë. Në një intervistë për “KTV”, trajneri i përfaqësueses së Kosovës, Bernard Shaland, preku çështjen e mbrojtësit Florent Hadërgjonaj.
Futbollisti 24-vjeçar, i cili aktivizohet me Hadërsfilld Toun në Premier Ligë, ka qenë pjesë e grumbullimeve të kombëtares zvicerane, por mbrojtësi i krahut të djathtë nuk është aktivizuar ende në një ndeshje zyrtare me përfaqësuesen “helvete”, çka e bën kalimin e tij te përfaqësuesja kosovare, thjesht një çështje procedurash.
“Ne kemi disa lojtarë që duhet të vendosin. Hadërgjonaj është njëri nga këta lojtarë. Konkurrenca te Zvicra në pozicionin e tij është shumë e madhe. Them se aty nuk do ta ketë të lehtë, kështu që shpresoj që ai të vijë të luaj për Kosovën”, tha Shaland.
